|
PROXECTO GATO é unha asociación sen ánimo de lucro fundada co fin de controlar e mellorar a calidade de vida dos gatos dos nosos barrios, e das persoas que viven preto deles, e así conseguir unha convivencia en harmonía, xa que todos compartimos o mesmo espazo: a nosa cidade. Posuímos sobrada experiencia levando a cabo esta labor por iniciativa propia e de forma individual dende moito antes de crearse a asociación. En cinco meses xa foron esterilizados 85 gatos, contando coa colaboración de varias clínicas veterinarias de Vigo. Ademais, preto de 80 gatos recollidos nas rúas teñen xa un novo fogar. SITUACIÓN ACTUAL Nos últimos anos, Vigo medrou moi apresa, edificándose en fincas habitadas por colonias de gatos, quedando así fóra do seu hábitat, espallados, atrapados... cun destino realmente cruel: morte por inanición, doenzas, atropelos, agresións... Os principais asentamentos de gatos atópanse na área metropolitana de Vigo, sen esquecer as colonias localizadas en parroquias coma Bembrive ou Valadares. A poboación de gatos rueiros na nosa cidade achégase a uns 2.800 individuos, polo que non sería unha solución factible ou ideal levalos a todos a un refuxio. Certo é que nun refuxio teñen acollida e alimento, e que están baixo continua atención, pero non viven en liberdade. Por moi grande que fose a súa extensión, contarían cun espazo individual mínimo e insuficiente.A solución non está en retirar as colonias das rúas, posto que está demostrado que ó pouco tempo hai que realizar outra vez a mesma tarefa, senón en evitar a superpoboación mediante a esterilización fronte ó sacrificio masivo e inhumano, impropio e impensable en sociedades avanzadas coma a europea. Privar de alimento ós gatos é tamén un método totalmente ineficaz e cruel. O procedemento de capturar-esterilizar-ceibar, ten sido deica agora o único método eficaz para controlar o crecemento da poboación de gatos rueiros en moitas cidades estadounidenses (Nova Iorque, San Diego, San Francisco, Houston, Miami...) e en países europeos coma Alemaña, Italia, Holanda...Só a esterilización do 100% da colonia leva a un descenso gradual da poboación. Ademais, os cidadáns están cada vez mais sensibilizados co problema e son mais receptivos a métodos compasivos. Se saben que os animais serán ceibados novamente e controlados sanitariamente e non sacrificados, será mais fácil mobilizar voluntarios en número suficiente para, correctamente organizados, poder levar o control das nosas colonias gatunas.O fedor, as pelexas e as miañadas nocturnas dos gatos, perturban o descanso de moitos veciños, e a sucidade provocada por unha colaboración mal entendida de persoas que lles botan comida dende as fiestras, son feitos que xeran unha actitude negativa e conflitos nas parroquias. Cada día que pasa a situación é mais complexa. A realidade demanda unha solución urxente. É preciso conseguir unha mellora significativa na calidade de vida e benestar dos gatos da nosa cidade, así como dos veciños próximos ás colonias: Debemos asegurar unha convivencia en harmonía. En Proxecto GATO esterilizamos, medicamos e damos en adopción ós gatos abandoados que necesitan urxentemente un fogar. Organizamos charlas en colexios e asociacións de veciños para conseguir una convivencia harmónica entre gatos e humanos. Vamos a construir un refuxo para aloxar a todos aqueles gatos que no poidan vivir nas rúas. Proxecto GATO persegue os seguintes obxectivos: 1. Controlar as colonias de gatos rueiros da nosa cidade, e preservar a súa vida e dignidade, mellorando no posible a súa calidade de vida. 2. Xestionar a construción e mantemento dun refuxio exclusivo para gatos abandonados e para os rueiros que non poidan valerse por si mesmos por doenzas, vellez ou accidente, no que receban tódolos coidados necesarios en canto a alimentación, atención veterinaria e agarimo. Ningún animal será sacrificado excepto por razóns humanitarias. 3. Xestionar no refuxio un centro de adopción de gatiños bebés e dos gatos mansos e moi especialmente, a adopción de animais adultos esterilizados. 4. Fomentar na xente sentimentos de agarimo e protección cara os animais, comezando polos mais novos, incluíndo programas de formación nos centros de ensino. Pódese medir o nivel de educación cultural dun país polo trato que reciben os animais. Respetemos o dereito dos gatos rueiros a vivir. Cremos que o futuro está na educación, non unicamente dos máis pequenos, senón de toda a cidadanía.
|
